Наместо јавност, шепотење по ходниците, страв, закани, казни. Во Македонска-радио телевизија, наместо нов имиџ на вистински и модерен јавен сервис, како што се ветуваше со новиот кадровски состав, новинарите се репресирани од надредените.
Новинари, кои не се по „вкусот“ на уредништвото и менаџментот, се прераспоредуваат во споровозни редакции, од дневната редакција се префрлаат во редакции кои според раководството не се толку атрактивни и не се закана за нивната фотелја.
Од ЗНМ велат дека има казнети новинари и со 30 проценти пониска плата бидејќи имале свој став за состојбите во МРТ и тоа јавно го кажале на годишното Собрание на Здружението на новинарите. За раководството на МТВ ова е кршење на работниот ред и дисциплина.
Новинарите како чиновници треба да реферираат како го минале денот и што сработиле за 8-те работни часови, но и за тоа со кого и зошто контактирале.
Вработените, се жалеа и дека врз нив се врши мобинг и дека се под закани и уцени да го напуштат ЗНМ и да се зачленат во Македонската асоцијација на новинари.
Токму оваа Асоцијација е најголем поддржувач за донесување на новиот Закон за медиуми, на што жестоко се спротивстави новинарската фела, бидејќи велат, ова ќе значи воведување на цензура и ќе ја отежне работата.
И она што зачудува. Синдикатот на МРТ е член на Синдикатот на индустрија, енергетика и рударството. Овој Синдикат вели дека нема сознанија за случувањата во МРТ.