Од денеска до 18 мај на Филолошкиот факултет „Блаже Конески“ во Скопје ќе се одржи Осмиот научен собир на млади македонисти. Настанот го организира Катедрата за македонски јазик и југословенски јазици, а негов покровител е ректорот на Универзитетот „Свети Кирил и Методиј“.
На собирот се пријавени 50 учесници, од кои 19 се странци, главно студенти, постдипломаци, докторанти од странски универзитети кои се занимаваат со теми од областа на лингвистиката и славистиката.
Првиот научен собир на млади македонисти се одржа пред 20 години, а од оваа година во својот назив тој ќе добие уште една одредница – Конференција во чест на професор Лилјана Минова – Ѓуркова. Со ова катедрата изразува благодарност и чест на професорката која беше иницијатор и долгогодишен поддржувач на овие собири.