Во Извршниот одбор на СДСМ доминира ставот дека на Конгрес може да одат најмногу тројца кандидати за претседател, бидејќи како што велат, сè што е над таа бројка ќе остави несериозен впечаток за јавноста.
„Сè погласни се информациите дека од изборната трка ќе биде исклучен поранешниот разузнавач и близок соработник на Црвенковски, Кире Наумов, кој всушност меѓу првите најави дека ќе се кандидира за нов лидер на СДСМ“, пишува денешен Утрински весник.
Како што се вели во статијата, тој ќе биде дисквалификуван од трката за нов лидер на најголемата опозициска партија под образложение дека не исполнува дел од критериумите, односно дека изминатиов период со своите настапи ѝ нанесувал штета на партијата.
Денеска се очекува во централата на партијата да пристигнат последните предлози од неколку општински организации, по што продолжува постапката за филтрирање на кандидатите кои ќе ја продолжат внатрепартиската изборна трка на Конгресот што ќе се одржи на 2 јуни.
Партиски извори информираат дека в четврток ќе заседава Извршниот одбор на партијата на кој ќе се утврди конечната кандидатска листа, пишува Утрински.
