Во Прилеп на 15 и на 17 мај ќе биде организирана седмата по ред манифестација Денови на Крали Марко. Со неа ќе биде одбележана годишнината од загинувањето на Кралот Марко, опеан јунак во народната традиција и препознатлив белег на Прилеп.
Во Центарот за култура „Марко Цепенков’ присутните ќе имаат можност да ја погледнат проекцијата на анимираниот филм за Крали Марко, кој е изработен од учениците од Прилеп и од Кралево.
На 17 мај на мултимедијално платно во населбата Варош под Марковите кули ќе се одржи ликовен хепенинг насловен „Децата го цртаат Крали Марко“, а вечерта со почеток во 20 часот во амфитеатарот во Варош ќе биде одржан акустичен концерт на групата La Colonie Volvox на кој ќе настапат Сашо Гигов – Гиш, Калина Велковска, Предраг Икономовски и многу други.
Од локалната самоуправа изјавуваат дека оваа манифестација го промовира градот Прилеп како место каде што живеел легендарниот Крали Марко и место што претставува неодминлина дестинација за туристите.