Во контролата што ја изврши Министерството за здравство во Градската oпшта болница „8 Септември“ констатирани се сериозни дискрепанции на несовпаѓање меѓу внесените податоци од лекарите и реалната состојба во системот за плаќање по учинок, изјави денеска министерот за здравство Никола Тодоров.
Апелираше до сите лекари повторно да ги внесат податоците за учинок.
– Не сакаме да бидеме ставени во ситуација да поднесуваме кривични пријави против оние што внеле лажни или грешни податоци во системот, изјави Тодоров.
Очекува до 14 мај лекарите да ги внесат реалните податоци во системот за плаќање на учинок, а потоа, рече, на 15 мај ќе биде исплатена нивната плата.
Тодоров притоа истакна дека веќе следниот ден на 16 мај ќе бидат повторно контролирани сите болници и здравствени институции каде што е воведен системот за плаќање по учинок.
Предупреди дека за внесување на лажни податоции стекнување противправна имотна корист лекарите може да бидат гонети кривично, односно против нив да биде поднесена кривична пријава и да бидат казнети со парична казна и затвор до три години.
Стопирана е исплатата, исто така на наградата на стоте најдобри лекари чии имиња беа неодамна објавени во дневните весници. Причина за тоа, како што рече Тодоров, биле забелешките што за пријавените учиноци стигнале до него од двајца доктори. Министерот рече дека ќе бидат проверени учиноците на сите сто лекари.
Контролите на Министерството за здравство ќе продолжат. Денеска се прави контрола во Клиниката за хируршки болести „Св. Наум Охридски“ и во Битолската болница.