Пет момчиња се повредени во тешка собраќајна несреќа што се случила вчера доцна попладне, кај месноста „Сепарација“ на патниот равец Дебар-Маврово, делница Долно Косоврасти-Бошков Мост.
Повредените момчиња на возраст од 20 до 23 години сите се од село Горно Косоврасти, кои се враќале од првомајски излет.
– Момчињата беа донесени во Општата болница во Дебар и по укажаната прва медицинска помош, едното од нив, кое е во тешка состојба е упатено на понатамошен третман во Клинички центар Скопје, другото во Специјалната болница за ортопедија и трауматологија „Св. Еразмо” во Охрид, додека останите три се задржани на хирушкото одделение при нашата болница -изјави директорот на општата болница, Баки Халили.
Според денешните информации врз момчињата кои се на лекување во Скопје и Охрид, извршени се оперативни зафати, состојбата им е стабилна но сеуште се во тешка состојба.
– Несреќата се случила во 18,45 часот, момчињата биле во возило „ровер“ со пробни регистарски таблички. Лицето Хермудин Ќеримовски кое управувало со возилото изгубило контрола врз возилото кое излетало од патот и удрило во бетонски ѕид. Причина за несреќата е неприлагодената брзина према условите на патот, изјави Стефан Димоски, портпарол на СВР Охрид.
Делницата Дебар-Бошков Мост има многу оштетувања кои претставуваат потенцијална опасност по безбедноста во собраќајот.