Два менаџера на фабриката денеска се уапсени во Бангладеш, 72 часа по уривањето на зградата каде се шиеше евтина облека за западните брендови, додека бројот на жртвите порасна на 325, а гневните работници протестираа на улиците на Дака.
Сопственикот на осумкатната зграда, која се урна врз повеќе од 3.000 работници, се уште е во бегство.
Зградата Рана Плаза, која се наоѓа во предградие на Дака, била изградена без дозвола и работниците биле пуштени во зградата иако претходниот ден имало предупредување дека објектот не е безбеден.
Гневот поради условите во кои работаат 3,6 милиони шивачи во Бангладеш, од кои поголемиот број жени, предизвика протести и судири со полицијата. Стотици луѓе утрово повторно излегоа на улиците, каде уништуваат и палат автомобили.
Спасувачите утрово извлекоа седум луѓе од под урнатините, а во тек е спасувачка операција за уште 15 лица заробени под бетонот. Досега се спасени околу 2.500 луѓе, а половина од нив не се повредени.