Најмалку 100 луѓе загинаа, а 700 се повредени откако се урна осумкатна зграда во предградие на главниот град на Бангладеш, Дака.
Во објектот имало фабрика за шиење облека и пазар, поради што се стравува дека бројот на жртви ќе биде расте.
Пожарникари и војници работат на спасувањето на затрупаните луѓе во зградата, а според нивните зборови ситуацијата е „катастрофална“.
Според полицијата, сопствениците на фабриката најверојатно не ги послушале предупредувањата на властите да не ги пуштаат работниците во зградата, откако претходниот ден таму била забележена пукнатина.
Шивачката индустрија во Бангладеш, што е во процут, во последните години постојано е следена од пожари и други инциденти.
Во ноември минатата година 112 работници загинаа во пожар во индустриското предградие на Дака, потсетуваат британските медиуми.