Индија планира во што е можно покуси рокови да го добие рускиот ракетен систем С-400, пред сè поради тензиите долж границата со Кина, јавуваат агенциите.
Ова е главна причина за посетата на индискиот министер за одбрана Раџнат Синг на Русија, каде ќе се сретне со својот руски колега Сергеј Шојгу.
Москва и Њу Делхи во 2018 година склучија договор за испорака на рускиот ракетен систем С-400, во вкупна вредност од околу пет милијарди долари. Според договорот, системите треба да бидат испорачани во Индија до крајот на 2021 година.
Освен за С-400, Индија има интерес и за купување на 33 нови ловци МиГ-29 и Сухој СУ-30МКИ. За време на посетата на Москва, се очекува индискиот министер за одбрана да го постави и прашањето за купување на резервни делови и други детали од руската воена техника.
Русија е најолемиот извезувач на одбранбена опрема и оружје за Индија.