Според нова анкета на шпанскиот Центар за социолошки истражувања, 65,7 проценти од испитаниците одговориле дека нема да одат на одмор ова лето, поради здравствената и економската криза предизвикана од коронавирусот.
Резултатите од анкетата покажуваат дека 40,8 отсто од Шпанците се загрижени за здравствената состојба поради Ковид-19, а 34 проценти од нив од финансиската криза која е резултат на пандемијата.
Шпанија, една од најпогодените земји од епидемијата во Европа, во понеделник ќе ги отвори своите граници, кои беа затворени од 13 март, и ќе овозможи туристички патувања. Право да влезат во Шпанија ќе имаат само жителите на земјите-членки на шенген зоната, додека границата со Португалија ќе биде отворена на 1 јули.
Туризмот учествува со 12 отсто од бруто домашниот производ на Шпанија.
Рекордни 80 милиони туристи минатата година ја посетија земјата, но сега плажите се празни, хотелите допрва ќе се отвораат, а илјадници работници се надеваат дека ќе се вратат на работа.
Во понеделникот, по три месеци, странски туристи пристигнаа на Балеарските Острови во рамките на пробна програма.