Двајца рудари загинале во несреќата која синоќа се случила во рудникот „ЧСМ“ во областа Карвин во источна Чешка, јави дописникот на МИА од Прага.
Иако раководството на рударскиот гигант за црн јаглен „ОКД“ во чија сопственост е рудникот, не сака да шпекулира за причините за смртта на двајцата рудари се дознава дека тие најверојатно се задушиле при земање на примероци од затворен простор во јамата.
– Со сигурност можеме да кажеме дека не дошло до затрупување, експлозија или потрес на земјата. Се друго би било шпекулација, изјави портпаролот на „ОКД“, Владислав Собол.
Според него, рударите кои имале по 34 години, загинале 1.100 метри под површината на земјата.
Причините за несреќата ги испитува специјална комисија.
Минатата година во несреќа во рудниците на компанијата ОКД загинаа пет рудари.