Во големата сала на Општина Велес денеска се одржа свеченост по повод примопредавањето на должноста и функцијата градоначалник помеѓу досегашниот градоначалник Горан Петров и новоизбраниот Славчо Чадиев.
Новиот градоначалник од Коалицијата „За подобра Македонија“ Славчо Чадиев изјави дека Велес е стабилна општина и без долгови и оти таква ќе биде и по четири години. Чадиев потенцира дека ќе работи во интерес на сите граѓани и за просперитетот и развојот на Општина Велес.
Досегашниот градоначалник Петров на свеченоста на Чадиев симболично му ги предаде клучевите на градот и му посака здравје и успешна работа. Петров потенцира дека како настан на својот мандат ќе го памети кога 20-те илјади велешани заедно излегоа со порака „Никогаш повеќе – не“ за Топилницата во Велес. Општинската каса, рече тој, ја остава со позитвно салдо од 10 милиони денари и дека се исплатени сите долгови и обврски на општината. Сработеното во изминатите четири години го сублимира во печатен и електронски билтен.