На улица „Брсјачка Буна“ во Скопје, утрово околу 02,20 часот, во куќата сопственост на 62-годишниот Н.И., непознат сторител испукал шест крушуми и ја повредил 25-годишната Ѓ.Д..
МВР денеска соопшти дека во гостинската соба на приземјето од куќата седеле Ф.И.(37) и внуката Б. Е.(16), со соседката Ѓ. Д.(25). Притоа непознат сторител дошол до едно крило од терасната врата на гостинската соба и со употреба на огнено оружје, преку двојното термопан-стакло кршејќи го истото испукал во собата шест куршуми, при што ја повредил Ѓ.Д. и го напуштил местото на настанот.
Ѓ.Д. со возило на Брза помош била пренесена во Ургентен центар – Скопје, каде што дежурен лекар констатирал дека се работи за тешки телесни повреди и тоа една влезно-излезна рана во левата рака, една влезна рана во левата града, една влезна рана во левата надколеница, една влезна рана во левата бутина и една влезна рана во пределот на градниот кош, по што е префрлена на интензивна нега во КАРИЛ за понатамошно лекување.
На местото на настанот е извршен увид од екипа од СВР Скопје и во тек се мерки за пронаоѓање на сторителот и за расчистување на случајот.