Рестриктивните мерки за коронавирусот може да доведат до 20 проценти повеќе семејно насилство бидејќи жртвите се затворени со своите насилници, објави ОН, предупредувајќи дека пандемијата може да има „катастрофални последици“ за жените.
Десетици милиони жени немаат пристап до контрацепција поради пандемијата, а милиони повеќе девојки би можеле да бидат присилени на брак или обрежување, велат истражувачите.
Секои три месеци рестриктивните мерки може да резултираат во повеќе од 15 милиони случаи на семејно насилство повеќе од вообичаеното, според Агенцијата на ОН за сексуално и репродуктивно здравје (УНФПА).
Тие проекции акцентираат на она што ОН го нарекува „пандемија во сенка“.
– Овие нови податоци покажуваат катастрофални последици поради Ковид-19 кои може да ги погодат жени и девојки во целиот свет, изјави шефицата на УНФПА; Наталиа Канем.
Оваа пандемија ги продлабочува нееднаквостите, а милиони жени и девојки губат можност да ги испланираат своите семејства, да ги заштитат своите тела и здравјето, додаде таа.
Тие предвидуваат дека 44 милиони жени во 114 земји во развој ќе изгубат пристап до контрацепција, што може да доведе до еден милион несакани бремености доколку рестриктивните мерки траат три месеци.
Доколку траат 6 месеци, бројот ќе се искачи на 7 милиони несакани бремености, според студијата на Uниверзитетот „Џонс Хопкинс“, австралискиот универзитет „Викторија“ и „Авенир здравство“.