Владата денеска го пушти во употреба првиот контакт центар наменет за поддршка на бизнисот и граѓаните во врска со економските прашања во услови на справување со кризата предизвикана од КОВИД-19. Компаниите и физичките лица со јавување на телефонскиот број 02/324-8040 ќе можат да ги добијат сите потребни информации и појаснувања во врска со начинот и можноста за користење на економски и други државни мерки поврзани со справување со состојбата со КОВИД -19.
– На LIVE Call Center – контакт линијата, која што е донација од компанијата Ассеко СЕЕ Македонија ќе одговара стручен тим на македонски и албански јазик. Кол центарот ќе работи од 8:00 до 17:00 часот од понеделник до петок, а во сабота од 9:00 до 14:00 часот, информира владината прес-служба.
Како што се посочува во соопштението, за начинот и користењето на економските и други мерки за бизнисот и граѓаните што изминатиот период го донесе Владата за полесно справување со кризата предизвикана од коронавирусот, заинтересираните ќе може да се јавуваат во кол-центарот
Од Владата потсетуваат дека досега се донесени два сета економски мерки, кои, како што велат се во насока на поголема ликвидност на бизнисот и зачувување на работните места.
За да сочуваме што поголем број работни места, велат од Владата, обезбедуваме финансиска поддршка за компаниите и самостојните вршители на дејност:
– За исплата на плати за месеците април и мај компаниите ќе добиваат 14.500 денари по вработен.
– Овозможено е користење на бескаматни кредити за микро, мали и средни компании.
– Воведуваме субвенционирање на 50% од придонесите на плати на вработените.
– Обезбедуваме исплата на минимална плата за спортските работници и уметниците.
– Обезбедивме финансиска помош за занаетчиите и самостојните вршители на дејност.
Од Владата потсетуваат дека се олеснети обврските на компаниите и граѓаните за плаќање на долговите и обврските кон државата:
– Запрена е работата на извршителите до крајот на јуни.
– Создадени се услови за одложување на плаќање на ратите на кредитите за 3 до 6 месеци за што поголемиот дел од банките веќе излегоа со свои понуди.
– Ослободување од плаќање на месечни аконтациите за данок на добивка за април, мај и јуни.
– Намалување на казнената камата за јавни давачки.
– Намалување на законска затезна камата за правни и физички лица.
– Ставена е во мирување давачката за ЗАМП.
– Се запираат стечајните постапки.
За лицата коишто останаа без работа во услови на КОВИД-19, потенцираат од Владата, понудени се неколку видови на поддршка:
– Согласно законот за вработување и осигурување во случај на невработеност граѓаните кои останале без работа ќе остварат надоместок преку АВРМ согласно нивните години работен стаж.
– Го прилагодуваме системот на социјална заштита за брз влез на лицата кои останале без работен ангажман и биле дел од неформалната економија со цел да остварат право на гарантирана минимална помош.
Од Владата потенцираат и дека за лицата во социјален ризик и корисници на други социјални права донесени се низа мерки:
– Обезбедуваме дополнителна исплата на енергетски додаток за април и мај на околу 30.000 корисници.
– Продолжува исплата на образованиот додаток за третиот и четвртиот мерен период за учебната 2019/2020 година, без потврда за редовност во училиште.
– Продолжени се и роковите за поднесување на барањата за остварување на право на еднократна парична помош за новороденче, и за додатоците за трето и четврто дете.
– Ослободување од закуп за социјални станови.
Во соопштението се посочува и на мерките во делот на платен одмор, како продолжено е платеното отсуство од работа поради нега и одгледување на новороденче и посвоено дете се до истек на траењето на времените мерки, задолжително користење на годишен одмор во приватен сектор, задолжително користење на годишен одмор во јавен сектор, како и на Фондовите за помош за КОВИД-19, со нагласок дека е формиран Фонд за туризам за поддршка на туристичките дејности и Солидарен Фонд за КОВИД-19.
Владата, велат оотаму, продолжува да ја следи состојбата со КОВИД-19 и да носи мерки согласно реалните потреби на компаниите и граѓаните.