Изградба на ново основно училиште во населбата Железара, фекална и водоводна канализација во неколку населени места и мултифункционално игралиште во населбата Керамидница се дел од проектите што ќе се реализираат во текот на овој месец во општина Гази Баба.
Градоначалникот Тони Трајковски денеска на прес-конференција најави потпишување на договор со Светска банка за изградба на основното училиште „Глигор Прличев“ во вредност од 91 милион денари, изградба на улица која ќе ги спојува улиците Методија Андонов Ченто и Сречко Пужалка, како и фекална канализација за населените места Трубарево и „Гоце Делчев“ и замена на водоводната мрежа во Стајковци.
– Тоа што уште во првиот круг се избра градоначалник во општина Гази Баба и убедливо мнозинство во Советот претставува уште поголема обврска веднаш да почнеме да ја реализираме ветената програма, рече Трајковски, заблагодарувајќи им се на граѓаните за укажаната доверба уште во првиот круг од локалните избори.
Во текот на овој месец планирано е да се отвори и шелтер центар за згрижување на жртви од семејно насилство. Објектот е во вредност од 1,7 милиони денари и се гради со поддршка на Министерството за труд и социјална политика и УНДП.
Покрај ова, во април треба да заврши и проектот за замена на уличните светилки со енергетки ефикасни со што ќе се заокружи целиот процес на замена на 6.600 светилки. Планирана е и изградба на парк пред културниот дом во населбата Ченто.