АД ЕСМ во соработка со Синдикалната организација на компанијата и Синдикатот на РЕК Битола испрати хуманитарна помош за Дебар составена од 1.000 пакети со неопходни прехранбени производи и производи за лична хигиена во вкупна вредност од околу три милиони денари.
Во секој од пакетите, како што информираат од компанијата, има по 25 килограми брашно, шест шишиња зејтин, шест килограми шеќер, шест пакетчиња макарони, 20 ролни тоалетна хартија, по две заштитни маски и средства за дезинфенција на раце.
-Во овие кризни времиња, кои не потсетија колку е скапоцен животот и здравјето на секој од нас, АД ЕСМ се надева дека хуманитарната пратка ќе ги ублажи последиците од кризната состојба во Дебар и Центар Жупа. Во Дебар е седиштето на нашата хидроцентрала Шпилје и чувствуваме и морална одговорност да помогнеме. Општествената одговорност на АД ЕСМ многу пати досега била потврдена, а со овој гест ги охрабруваме и останатите компании, државни и приватни, секој во рамките на своите можности, да помогнат онаму каде што сметаат дека има потреба, изјави генералниот директор на АД ЕСМ, Васко Ковачевски, при испраќањето на хуманитарната помош, која тргна од Битола.
Помошта во Дебар ќе ја преземе градоначалникот Хекуран Дука, кој раководи со Оперативниот кризен штаб за градот.