Приходите од нафта и гас на земјите во развој би можеле да достигнат најниско ниво во последните повеќе од две децении, доколку потрае сегашната состојба на пазарот на енергенти, предупредуваат Меѓународната агенција за енергетика (ИЕА) и Организацијата на земјите извознички на нафта (ОПЕК) во заедничко соопштение.
Генералниот директор на ИЕА, Фатих Бирол и генералниот секретар на ОПЕК, Мохамед Баркиндо изразија „длабока загриженост“ поради пандемијата од коронавирусот, предупредувајќи дека таа би можела да има „потенцијално долгорочни економски и општествени последици“.
Бирол и Баркидо наведуваат во соопштението дека очекуваат земјите во развој оваа година да забележат пад на приходите од нафтата и гасот за 50 до 85 отсто, додавајќи дека е „значајна пазарната стабилност, бидејќи производителите ги чувствуваат последиците“.
Цената на северноморската нафта „бренд“ изнесува 29,91 долар за барел, што е намалување од 0,7 проценти во однос на претходниот ден, додека американската нафта WTI поскапела за повеќе од еден отсто, на 28,98 долари за барел.