Во рамки на кампањата „Каков белег ќе оставиме фер избори 2013“, кандидатите за градоначалници на општина Велес, Славчо Чадиев и Аце Коцевски, денеска потпишаа Кодекс на однесување за слободни и фер избори и проговорија за нивните согледувања околу досегашната изборна кампања.
Чадиев потенцираше дека изборите се фер и демократски и ги повика велешани в недела да излезат слодобно и својата волја да ја искажат за новиот градоначалник. Коцевски, пак, оцени дека изборите не се демократски и фер. Сепак, верува, дека велешани, како што рече, нема да потклекнат на притисоците и заканите и ќе одлучат слободно кој ќе ја води нивната општина.
Кампањата за фер и демократски избори првпат стартуваше во 2002 година за парламентарните избори и досега континуирано се спроведува. Целта е кандидатите да се заложат за спроведување фер и демократски избори, владеење на правото и соодветно изборно однесување. Ја иницираше Институтот за парламентарна демократија, а се реализира во соработка со Националниот демократски институт за меѓународни односи.