Поранешниот градоначалник на Општина Центар и сопственик на „Тинекс“, Владимир Тодоровиќ, не се појави денеска во судот, каде што требаше да сведочи на рочиштето за случајот „Рекет“.
Тој со писмен поднесок го известил судот дека од 25 до 28 февруари ќе престојува во Бугарија поради деловни обврски.
Судењето се одложува за утре кога одбраната треба да ги обезбеди сведоците Тодоровиќ и Лидија Јаневска, која исто за денешното рочиште имала неуредна достава на покана.
Случајот „Рекет“ е во доказна постапка и го води судијката Васка Николовска-Масевска, а застапник на обвинението е Вилма Русковска.
Владимир Тодоровиќ е еден од 12-те предложени сведоци од обвинетиот Бојан Јовановски – Боки 13, а потоа треба да сведочи и сопственикот на „Пелистерка“ Цветан Панделески, еден од осомничените во случајот „Империја“ заедно со Орце Камчев.
Судијката Васка Николовска-Масевска информираше дека судот го одбива барањето на обвинетиот Бојан Јовановски за укинување на мерката притвор. Јовановски и неговиот адвокат Сашо Дукоски континуирано бараат тој да биде пуштен во домашен притвор поради здравствени проблеми и потреба од посебни хигиенско-диететски услови.
Обвинението против Бојан Јовановски, Катица Јанева и Зоран Милески Кичеец беше поднесено лани во октомври. Првообвинетиот Јовановски се сомничи дека сторил кривично дело „перење пари и други приноси од казниво дело“ и за „примање награда за противзаконито влијание“. Второобвинетата Јанева се товари дека сторила кривично дело „злоупотреба на службена положба и овластување“. На првото рочиште за „Рекет“, што се одржа на 3-ти декември минатата година, третообвинетиот Зоран Милески-Кичеец призна вина за делото „примање награда за противзаконито влијание“, по што беше осуден на три години затвор.