Кандидатот за градоначалник на општина Делчево од коалицијата „За подобра Македонија“, Дарко Шехтански денеска им се заблагодари на граѓаните за дадената поддршка во првиот круг од изборите и ги повика во вториот круг да гласаат за подобра и поубава општина.
– Нашата програма е составена од проекти кои се плод на желбите на граѓаните и можноста на локалната самоуправа и Владата на Република Македонија да ги реализираат предвидените проекти. Ветуваме развој, просперитет, поубава и побогата општина Делчево, рече Шехтански на прес-конференција.
Вети изградба на инфраструктура за индустриската зона Долни Бавчи, изградба на технолошко индустриска зона, реконструкција на регионалниот пат Делчево-планина Голак во должина од 10 километри, изградба на филтер станица на браната Лошана, фекална канализација во неколку села и изградба на локални патишта.
– На Делчево му се потребни работни места. Нашата младина постепено ја напушта општината, младите се иселуваат во странство. Нашата желба е да ги задржиме во општината и да створиме услови за враќање на веќе иселените, истакна Шехтански.
Во неговата програма има и проект за регулација на реката Брегалница, а планирана е и доградба на детската градинка „Весели Цветови“ и реконструкција на основните училишта „Ванчо Прќе“ и „Св. Климент Охридски“.