Новоизбраниот градоначалник на Охрид Никола Бакрачески оствари работна средба со извршните директори на нискобуџетниот авио-превозник „Визер“, претставници од Министерството за транспорт и врски, како и на компанијата „ТАВ“ што стопанисува со аеродромите во Охрид и Скопје, на која е разговарано за можностите за зголемување на фреквенцијата на летови на охридскиот аеродром.
Бакрачески нагласи дека на средбата било разговарано за можностите и капацитетите на што во сферата на авиосообраќајот ги поседува регионот, за реализација на поголем број летови од охридскиот регион, биле разменети и идеи и предлози на кој начин идната локална самоуправа може да придонесе во субвенционирањето на таквите летови.
– Целта е да проработи охридскиот аеродром онака како што треба и мора да работи и на тој начин да ја зголемиме фреквенцијата на летови од овој аеродром кој што понатаму ќе води кон забрзан развој на туризмот, односно привлекување странски инвестиции и економски раст и развој на општината, изјави Бакрачески, нагласувајќи дека не може да се замисли унапредување на туризмот во градот без стабилен и континуиран авионски сообраќај.
На средбата било оценето дека за авиопревозникот „Визер“ особено се интересни градовите од Југозападниот регион на Македонија, вклучувајќи ги Охрид, Струга, Ресен, Битола и Македонски Брод, кои заедно со албанските градови Корча и Поградец претставуваат популација од речиси 800 илјади жители.
– Тоа е потенцијалот што отвора можности за зголемување на фреквенцијата на патници на охридскиот аеродром, а на тој начин ќе ги задоволиме потребите на локалната самоуправа односно во нејзините заложби да се зголеми фреквенцијата на авионските линии од нашиот аеродром, притоа имајќи ги предвид и интересите на „ТАВ“ и на самиот авиопревозник, вели Бакрачески.
Новата локална самоуправа размислува и за учество во субвенционирање на агенциите и тур-операторите при формирањето на цената на авиобилетите и тоа не само во текот на летниот период туку и во насока на реализирање одреден број летови во текот на целата година.