Француската полиција притвори три лица, вклучувајќи и еден војник на југот на Франција под истрага за минатогодишните терористички напади во Тулуз, објави денес обвинителството на градот.
Францускиот претседател Франсоа Оланд, пред 10 дена во Тулуз изјави дека Франција го засили собирањето на разузнавачки информации за да спречи терористички напади како оние што ги изврши Мохамед Мерах во тој град.
Мерах, според соопштението на полицијата, во март минатата година уби три еврејски деца, рабин и тројца војници. Тој подоцна беше убиен во вооружен судир со полицијата.
Две лица се уапсени доцна вчера во Тулуз и тоа во населбата каде што Мерах, радикален муслиман, поминал дел од детството. А третото лице, војник на должност, беше уапсен утрово во Кастро, соопшти портпаролката на Обвинителството Ањез Тибо Лекуивр.
Таа рече дека сите тројца биле блиски со Мерах, но иследниците сакаат да знаат каков точно бил нивниот однос и дали некој од нив можеби бил вмешан во подготовката на нападите од минатата година.
Претходно, во врска со овој случај беа уапсени пет луѓе, но сите беа ослободени по сослушувањето. Само братот на мерах, Абделкадер е обвинет за соучество и е задржан во притвор.