Кандидатот за градоначалник од СДСМ, Зоран Дамјановски им се заблагодари на граѓаните и за излезноста и за укажаната доверба. Тој во првиот круг освои 19.320 гласови.
– Во овој изборен процес одиме од нула и јас и кандидатот од ВМРО-ДПМНЕ, ќе се бориме за гласовите на останатите учесници од изборниот процес во првиот круг, за околу 16.000 гласови. Тоа е голем предизвик за мене како градоначалник кој во изминативе два мандати практикував концепт кој нуди еднаков пристап на сите граѓани, вели Дамјановски.
Кандидатот за градоначалник ги повика сите граѓани без разлика на етничката припадност во вториот круг од изборите да ја дадат поддршката и да придонесат, рече, за развој на демократијата.
На новинарско прашање дали имаат договор со која било друга политичка опција, Дамјановски тврди дека немаат конкретни договори со никој, но оти очекува индивидуална поддршка на гласачите од независно-политичката опција.
– Околу 4.000 гласови се дадени за кандидатот Виктор Цветковски, така што без разлика на концептот, идеолошки сме многу блиски. Нема никаков конкретен договор,но очекувам индивидуална поддршка од гласачите, рече Дамјановски, додавајќи оти очекува поддршка и од Српската Напредна Странка.