Зацврстување на улогата на граѓанскиот сектор во развојот на јавната политика и донесувањето одлуки преку поголема отчетност и промовирање на недискриминација и социјална инклузија и социјални права се приоритетите на годинашниот јавен повик за предлог проекти на Европскиот инструмент за демократија и човекови права (EIDHR).
Алесандро Ангиус, новиот координатор на Европскиот инструмент за демократија и човекови права при Делегацијата на ЕУ во Македонија на денешната средба со претставници на невладиниот сектор ги изложи новините што ги носи овој јавен повик кој е објавен пред неколку недели.
– Со промовирање на отчетноста на институциите улогата на граѓанскиот сектор би можела да биде фундаметална при усвојување на националниот буџет или мониторинг на кој начин владата ги троши јавните средства. И во поглед на областа на човековите права, целта е да се обезбеди повисок степен во однос на почитување на овие права, рече Ангиус.
ЕИДХР е инструмент кој ги покрива најголем дел од земјите во светот, а особено е важен за земјите во развој. Инструментот е важен и за земјите од Балканот, особено оние како Македонија кои се во процес на пристапување за членство во ЕУ, бидејќи им помага во тој процес и цели кон Копенхашките критериуми во делот на заштитата на малцинските права и почитување на човековите права и слободи и владеење на правото.
ЕИДХР е дизајниран на начин да му помогне на граѓанското општество да постигне резултати во областа на човековите права и фундаментални слободи. Инструментот е единствен по својата природа затоа што за разлика од ИПА, го одредуваат Делегацијата на ЕУ во директна комуникација со граѓанското општество. Воедно, тој е комплементарен на ИПА бидејќи помага за градење на капацитетите на граѓанското општество.
Вкупно 1,2 милиони евра изнесуваат средствата кои оваа година во рамки на ЕИДХР се наменети за Македонија. Рокот за поднесување апликации за проекти што ќе се финансираат преку овој инструмент истекува на 12 април годинава.