Важноста на институционалната соработка меѓу Република Македонија и Република Албанија во контекст на договорената соработка во областа на евроинтеграцијата на двете држави била нагласена на денешната средба на заменик претседателот задолжен за европски прашања, Фатмир Бесими со албанскиот амбасадор во Скопје, Арбен Чејку.
Како што соопшти СЕП, тема на разговорите биле и актуелните случувања, каде вицепремиерот Бесими и амбасадорот Чејку се согласија, дека овие локални избори, кои се за граѓаните и за развојот на општините, треба да се сметаат и како придонес кон демократскиот имиџ на државата.
– Тие може да помагаат за внатрешна интеграција и зајакнување на меѓуетничките односи, како предуслов за интеграциона и евроатланска визија на Македонија, се вели во соопштението од СЕП.
Во таа насока, на средбата станало збор и за посетата и идните средби на заменик претседателот Бесими на Тирана, поврзани со агендата за интеграции на двете држави во ЕУ, како и за добрососедската и регионалната соработка.
Амбасадорот на Република Албанија воедно му ја честиташе на заменик претседателот Бесими новата функција и се заблагодари за одличната соработка, која двете држави ја имаа во областа на одбраната и интеграциите во НАТО, во време кога Бесими раководеше со Министерството за одбрана на Република Македонија.