ВМРО-ДПМНЕ ќе продолжи во континуитет со реализација на проекти во Свети Николе. Досега реализиравме голем број проекти, а ќе продолжиме и со нови кои се дел од Програмата за претстојните локални избори, а која содржи 122 проекти кои се од потреба на граѓаните.
Ова го истакна кандидатот за градоначалник на Свети Николе од ВМРО-ДПМНЕ Зоран Тасев на прес-конференција во партиското седиште во Скопје.
Тој напомена дел од проектите што се реализирани и кои беа суштински за градот да стане модерен и успешен. Меѓу нив се регионален систем за водоснабдување „Злетовица“, регионалниот пат, реконструкција на Домот на културата…
– Во наредниот период сме исправени пред предизвикот да создадеме услови за привлекување странски инвеститори и општината да ја афирмираме да стане препознатлива по многу работи, рече Тасев напоменувајќи дека во наредниот период се планира почнување на изградбата на патниот правец Миладиновци – Свети Николе – Штип, асфалтирање на патниот правец Свети Николе-Пробиштип, уредување на речното корито на Светиниколска Река, изградба на паркинг за товарни моторни возила, изградба на нов сточен Пазар.