Земјотрес од 6,1 степен според Рихтеровата скала утрово го стресе грчкиот остров Крит, почувствуван и во Скопје. Земјотресот според Европскиот медитерански сеизмолошки центар е на длабочина од 55 километри, а се случил во 9 часот и 23 минути по локално време.
Според коментарите на оние кои го почувствувале, земјотресот бил со голема бучава, а тресењето се почувствувало во два брана.
Во Грција земјотрес со јачина од 4,2 степени според Рихтер беше почувствуван и вчера, на 166 километри западно од Атина.
Не престанува да се тресе ниту тлото во Албанија, каде што по силниот земјотрес од 6,4 степени вчераутро, почувствувани се уште серија помали земјотреси.
Професорот Михаил Гаревски вчера за „А1он“ изјави дека е мала веројатноста за поврзаност на земјотресите. Тој смета дека е поверојатно да се работи за изолирани појави.