Кандидатот за градоначалник на општина Гевгелија од „Сојузот за иднината“, Саве Марачков, вечерва оствари средба со жителите на пограничното село Богородица. Во непосреден разговор со граѓаните од ова населено место, тој разговараше за приоритетите за развој на општината и секое населено место како дел од неа.
За Богородица Марачков ја истакна потребата од посолидни урбани услови за живот на граѓаните од ова населено место, изградба на атмосферска и канализациска линија до секој дом од населбата, решавање на проблемот со водоснабдувањето преку градскиот водовод на кој е приклучена Богородица и квалитетот на водата за пиење.
Од разговорите произлегоа и заедничките потреби искажани од присутните, меѓу кои посочени беа барања на граѓаните за решавање на проблемот со јавниот превоз, редовно одржување на одводниот канал, главните колски патишта.
Марачков ги истакна приоритетите на граѓаните како свои програмски заложби, особено што тие му се познати преку проектот „Отвори врата за иднината“, кој го спроведе СДСМ во соработка со СДММ од Гевгелија.
„Но, за до исполниме сето ова што вие го баравте, јас сум подготвен да го реализирам со изборот на функцијата заедно со советничката листа на ’Сојузот за иднината‘. Затоа, мораме најпрво на 24 март да ставиме крај на сето ова понижување, газење, малтретирање. Крај за сите манилпулирања, притисоци, казни и извршители, за сите отпуштени од работа и деградирања. Мора да ставиме крај, оти изгледа дека Франгов и ДПМНЕ не се свесни на кое дереџе ја донесоа Гевгелија. Од Гевгелија – европска порта, Франгов и ДПМНЕ направија само евтина политичка фарса“, истакна Марачков.
Богорочани побараа од својот кандидат да ја расчисти работата и на јавните претпријатија во надлежност на Општината, како примерот со гевгелиски Комуналец, каде што од 200 вработени, половина седат дома и ништо не работат, а примаат плата и на повик од граѓаните за решавање на некој дефект не реагираат никако.
„Не сакаме со наши пари да храниме партиски војници вработени само за гласови“ , револтирано изјавуваат жителите на најјужното гевгелиско село.