Кандидатите за градоначалници на Град Скопје и општина Гази Баба, Коце Трајановски и Тони Трајковски, како и носителот на советничката листа за Гази Баба, Милан Андоновски денеска во населеното место Гоце Делчев во општина Гази Баба, го промовираа проектот за изградба на главен фекален колектор на левата страна од реката Вардар.
Со овој проект е предвидено Градот Скопје во соработка со општина Гази Баба да изработи техничка документација за изградба на главен фекален колектор на левиот брег на река Вардар почнувајќи од Ќерамидница до новата пречистителна станица во Трубарево, во должина од 5,3 километри.
– Станува збор за проектот со кој ќе се реши еден голем проблем на повеќе од 15.000 жители кои живеат во населените места Скопско Поле, Гоце Делчев, Јурумлери, Колонија и Дрма. Градот Скопје ќе учествува во изградбата на примарниот фекален колектор кој што ќе ги поврзува овие локални канализации, изјави Трајановски.
Реализацијата на проектот „Изградба на колектор за отпадни води по десниот брег на реката Вардар до пречистителна станица – Скопје“ претставува прашање од огромен интерес за Градот Скопје. Изградбата на колектор за отпадни води на десниот брег на реката Вардар претставува неопходен услов за изградба на главна пречистителна станица со што ќе се реши прашањето на управување со отпадните води на подрачјето на Градот Скопје.