Кандидатот за градоначалник на СДСМ за Карпош Андреј Петров најавува дека целта во неговиот мандат за кој се кандидира ќе биде почитување на основните начела на урбанистичкото планирање, како и спротивставување на „дебармализацијата на Карпош“ и хуманизација на просторот.
Посочува дека ќе се залага за враќање на природата во Карпош, зелени површини, паркови, шеталишта кои, како што вели, ќе го заменат скапиот бетон околу нас.
– Ќе ја довршиме започнатата идеја за голем парк поставен на местото на оваа некогашна дупка и сегашна депонија од десната страна на Вардар, претворајќи ја во зелена површина со засадени дрвца, нови бели дробови на Општината, но ќе ја уредиме и левата страна на Вардар и граѓаните ќе можат, преминувајќи преку мостот Газела кој го направивме во претходниот мандат, да уживаат и од левата страна на Вардар, изјави Петров.
Тој ветува дека со новите зелени површини и садници на дрва во Карпош ќе се придонесе да биде најмалку загадената општина во Градот Скопје.
Карпош, како што истакна, ќе подари и уште едно живеалиште во Зоолошката градина, како што е направено и претходно во неговиот мандат со донацијата на живеалиштето за мечка.
