Кандидатите за градоначалници на Град Скопје и Општина Бутел, Коце Трајановски и Петре Латиновски, заедно со носителите на советничките листи за советите на Градот Скопје и Општина Бутел, Владо Поповски и Боби Бојчевски денеска ги промовираа проектите за пробивање на булеварот “Христијан Тодоровски Карпош” и реконструкцијата и проширувањето на улица “Босна и Херцеговина”.
Во програмата Трајановски е предвидено Градот Скопје да изработи техничка документација за продолжување на булеварот “Христијан Тодоровски Карпош” од подвозникот и ќе се поврзе оваа сообраќајница со заобиколницата. По изработката на техничката документација ќе се пристапи на реализација на овој проект, што ќе зависи од расчистувањето на имотно-правните односи кои се на неговата трасата. Трасата на која ќе се пробие новиот дел од булеварот “Христијан Тодоровски Карпош” е во должина од околу 1.750 метри.
– Пробивање на булеварот “Христијан Тодоровски Карпош” е од големо значење за Градот Скопје и Општина Бутел, бидејќи тука гравитираат и општините Чаир и Гази Баба и со неговата реализација ќе се овозможи алтернативен влез на Општина Бутел до Градот Скопје, бидејќи сега улицата “Бутелска” е единствениот влез и излез кон градот и таа е сообраќајно оптеретена, пред се во сообраќајниот шпиц, посочи Трајановски.
Во новата програма е предвидено и изработка на проект за проширување и реконструкција на улицата “Босна и Херцеговина”. Оваа сообраќајница ќе се прошири на потег од булеварот “Христијан Тодоровски Карпош” до булеварот “Словенија” во должина од 1200 метри, каде ќе се добие модерно сообраќајно решение со 4 сообраќајни ленти. Предвидено е да се реализира фазно, во зависност од решавањето на имотно-правните односи.