Кандидатот за градоначалник на Охрид на коалицијата „Сојуз за иднината“ предводена од СДСМ Александар Петрески денеска вети дека ќе застане зад побараувањата на вработените и стечајците од охридски „ЕМО“, односно исплата на сите долгови на „ЕМО“, од страна на државата како негов доминантен сопственик.
На денешната прес-конференција одржана пред поранешниот гигант на охридското и македонското стопанство „ЕМО“, Петрески ја обвини централната власт за неисполнување на обврските ветени со најавениот план на Владата за ревитализација на компанијата.
– Владата изминатите седум години потроши 17 милијарди евра буџетски средства, а не успеа да издвои седум милиони евра за „ЕМО“ за да ги расчисти обврските кон вработените и побарувачите, истакна Петрески.
Во меѓувреме, од општинската организација на СДСМ од Охрид информираа дека во текот на изминатата ноќ непознати сторители го демолирале реонскиот изборен штаб на здружената опозиција „Сојуз за иднината“ во населбата „Горна влашка маала“. За инцидентот бил известен Секторот за внатешни работи од Охрид, а во партијата очекуваат брзо откривање на сторителите и поголема будност за безбедноста на изборните штабови.