САД и Јапонија вчера начелно се согласија за основните елементи на трговскиот договор, а американскиот претседател Доналд Трамп и јапонскиот премиер Шинѕо Абе изјавија дека се надеваат дека спогодбата ќе биде потпишана идниот месец во Њу Јорк.
Ако договорот биде формализиран ќе се намалат трговските тензии помеѓу двата сојузници во време на ескалација на американско-кинеската трговска војна.
Американскиот секретар за трговија Роберт Лајтизер истакна дека во договорот се вклучени земјоделството, царините за индустриските произвиди и дигиталната трговија.
Царините на автомобилите остануваат непроменети.
– Тоа е многу голем бизнис и постигнавме начелен договор. Тоа се милијарди и милијарди долари, истакна Трамп на заедничката прес конференција со Абе на Самитот Г-7.
Абе изрази оптимизам во однос на договорот.
– Се уште останува дел од работата која мора да ја завршиме. Имено, мораме да го финализираме името на трговскиот договор и да ја финализираме содржината на договорот. Меѓутоа, сакаме да бидеме сигурни дека нашите тимови ќе ја забрзаат преостанатата работа, за договорот да биде потпишан на маргините на Генералното собрание на ОН кон крајот на септември, истакна Абе.
Трамп сака да им помогне на американските земјоделци кои се погодени од трговската војна со Кина односно со кинеските царини на нивните производи.