Кандидатите за градоначалник на Град Скопје и на општина Ѓорче Петров на ВМРО-ДПМНЕ и коалицијата „За подобра Македонија“, Коце Трајановски и Сокол Митровски, денеска на прес-конференција го презентираа проектот за продолжувањето на булеварот „Партизански одреди“.
Со проектот се предвидува реконструкција и проширување на булеварот „Партизански одреди“ од крстосницата со улицата „Ацо Шопов“ до кружниот тек на улицата „4 Јули“ и изградба на кружен тек со две коловозни ленти и средишно зеленило на вкрстувањето со улицата „Ѓорче Петров“, кај „Порта Влае“.
– Со овој проект ќе се олесни одвивањето на сообраќајот во овој дел од Градот и ќе се реши ова сообраќајно тесно грло. Булеварот ќе се прошири по десната страна во должина од 700 метри, во средишниот дел ќе се формира зелен појас и ќе се уредат тротоарите и велосипедските патеки, изјави Трајановски.
Во текот на градежните работи, додаде, ќе се реконструира постојната фекална канализација, ќе се постави нова атмосферска канализација и ново улично осветлување.
Кандидатот за градоначалник на општина Ѓорче Петров Митровски рече дека решавањето на оваа критична сообраќајна точка е повеќе од потребно.
– Тука, воедно е и првата слика на сите кои доаѓаат во Ѓорче Петров, посочи Митровски.