Јужна Кореја се надева дека вчерашната средба на американскиот претседател Доналд Трамп и севернокорејскиот лидер Ким Џонг-ун ќе помогне во оживување на дијалогот за Корејскиот Полуостров, кој беше прекинат поради застојот во нуклеарните преговори помеѓу Вашингтон и Пјонгјанг.
Портпаролот на јужнокорејското Министерство за обединување Ли Санг-мин оцени дека средбата Трамп – Ким би можела да ги оживи нуклеарните преговори и да им користи на напорите на Сеул да ги зачува преговорите и соработката со Северна Кореја.
Средбата Трамп – Ким различно е оцената од „историска средба“ до „театрално реално шоу“.
– Лидерите на двете држави се усогласија да останат во близок контакт во иднина со цел да се обнови и покрене продуктивен дијалог за постигнување на напредок во денуклеаризацијата на Корејскиот Полуостров и во билатералните односи, објави севернокорејската новинска агенција КЦНА.
Агенцијата наведува дека Ким и Трамп на тет-а-тет средбата разговарале за „прашања потребни за намалување на тензиите на Корејскиот Полуостров“ при „што изразија целосно взаемно разбирање и емпатија“.
– Храбрата одлука на двајцата лидери да одржат историски состанок создаде доверба без преседан помеѓу двете земји, кои долго време се вовлечени во длабоко вкоренет анимозитет, наведува КЦНА.
Според „Њујорк тајмс“ третата средба на Трамп и Ким беше организирана како телевизиски спектакл.
– Трамп е добар во привлекувањето на вниманието и да прави сензација. Кога таквите методи се применуваат за промовирање на мирот и стабилноста, тие можат да доведат до многу добри резултати… Состанокот помеѓу Трамп и Ким се чини дека е симболичен, но со тоа е променет статус квото меѓу двете земји и доведе до обновен дијалог. Всушност, тоа беше мала пресвртница во билатералните односи, објави кинескиот весник „Глобал тајмс“, кој излегува на англиски јазик.
Весникот додава дека е „чудо е што американскиот претседател успеа да воспостави личен однос со Ким покрај сериозната меѓудржавна конфронтација“.
– Пријателството помеѓу двајцата лидери сепак, никогаш не може да ги замени националните интереси на земјите страните, бидејќи неговата улога во решавањето на главните политички разлики е ограничено. Сериозни поделби помеѓу Вашингтон и Пјонгјанг се очигледно поважни од личниот однос меѓу нивните лидери, истакнува „Глобал тајмс“.
Аналитичарот Шин Беом-чул од Азискиот институт за политички науки за КЦНА наведе дека „типичната севернокорејска пропаганда го глорифицира Ким како носител на огромните промени во геополитиката“.
– Целта беше да се поправи нарушениот статус на Ким, откако тој се врати од Самитот во Ханој со празни раце, истакна Шин.
Аналитичарите се поделени за вчерашната средба Трамп – Ким, за едни тоа е нов импулс за отпочнување на нуклеарните разговори, додека за други тоа е „театрално реално шоу“.
Трамп и Ким во 2018 година првпат се сретнаа во Сингапур, при што беше нејасно форумулирана денуклеаризацијата на Корејскиот Полуостров, додека втората средба во февруари во Ханој се смета за неуспешна откако не беше постигнат договор за редуцирање на санкциите кон Северна Кореја.