Поетите Ефтим Клетников од Македонија и Анте Стамаќ од Хрватска се добитници на наградата „Книжевно жезло“ што Друштвото на писателите на Македонија традиционално ја доделува за поетски опус со високи естетски остварувања.
Одлуката, како што соопшти ДПМ, едногласно ја донело Претседателството на предлог на Организацискиот одбор на Меѓународната манифестација „Празник на липите“.
Ефтим Клетников зад себе има значаен поетски опус со низа стихозбирки кои оставија свој печат во развојните текови на македонската поезија во изминатите четири децении. Меѓу неговите најпознати стихозбирки се вбројуваат „Модер вир“, „Зраци и самраци“, „Окото на темниот“, „Икра и крило“, „Гласови“, „Живиот камен“ и „Име од вечност“. Избор од неговата поезија е објавен под наслов „Пурпурна јанѕа“. Добитник е на наградите „Браќа Миладиновци“, „Ацо Шопов“, „Григор Прличев“ за поема, награда за животно дело и други. Препејува од руски, француски, словенечки, српски и хрватски јазик. Беше директор на Струшките вечери на поезијата.
Анте Стамаќ е поет, книжевен научник, доктор по филолошки науки, универзитетски професор и член на Хрватската академија на науките и уметностите. Автор е на стихозбирките „Распаѓање“, „Време на припомнување“, „Насока“, „Тажаленки“ и „Избрани песни“. Носител е на високи хрватски награди, меѓу кои „Тин Ујевиќ“ и „Антун Бранко Шимиќ“. Анте Стамаќ е осведочен пријател на Македонија и македонската литература и учесник на Струшките вечери на поезијата и Рацинови средби. На македонски јазик, во препев на Бранко Цветкоски, е објавен избор од неговата поезија под наслов „Пресудни настани“.
Признанијата на добитниците ќе им бидат врачени на централната приредба на манифестацијата „Празник на липите“, на почетокот на јуни. ДПМ ќе објави посебна публикација со избор од поезијата на лауреатите на македонски, хрватски и англиски јазик.