„Промените се тука, видливи и конкретни, пред очите на сите граѓани и пред целата јавност.
Согласно одлуката на претседателот на СДСМ, Зоран Заев, разрешени се 78 претседатели на oпштинските огранизации на СДСМ, односно сите претседатели на општинските организации на партијата“, рече Костадин Костадинов, портпарол на СДСМ и пратеник.
„СДСМ се заблагодарува на сите досегашни претседатели за нивниот досегашен ангажман на локално ниво, како претставници на најголемата владејачка партија. Оваа одлука води единствено кон поправање, коригирање на слабите резултати во општините каде добивме јасен сигнал од граѓаните, и се разбира кон продолжување на добрата работа во општините каде граѓаните се задоволни.
Затоа, ги охрабруваме оние претседатели на општинските организации каде што беше забележана победа на изборите, повторно да се кандидираат на новиот конкурс што ќе биде објавен во текот на идната недела.
Промените кои носат подобар живот за граѓаните продолжуваат, следуваат нови чекори. Ја известуваме јавноста дека во недела, во 18.00 часот ќе се одржи седница на Централниот одбор на СДСМ, а за донесените одлуки јавноста навремено ќе биде информирана.
Пораката од граѓаните ја примивме со сериозност и постапуваме соодветно, темелно и навремено. Пред нас е предизвикот да научиме од сопствените слабости и да станеме уште подобри. Тоа е вредноста на новото време во нашето заедничко општество. Граѓаните реагираат, власта се поправа и служи уште подобро.
Убедени сме и ве уверуваме, дека во периодот што претстои ќе продолжиме уште попосветено да работиме на креирање мерки и политики што се во интерес на државата и сите нејзини граѓани“, изјави Костадин Костадинов, портпарол на СДСМ и пратеник.