Избирачите во Австралија гласаат денеска на парламентарни избори, на кои според последните анкети се очекува победа на конзервативците, по шестгодишното владеење на лабуристите, одбележано со економски процут, но и со внатрешни судири.

Резултатите од последните анкети покажуваат дека Конзервативната коалиција на Тони Абот ќе оствари голема победа над Лабуристичката партија на премиерот Кевин Рад.

Коалицијата може да очекува 53 проценти од гласовите на изборите во споредба со 47 отсто за лабуристите, покажува анкетата спроведена на барање на австралискиот весник „Дејли телеграф“.

Според истражувањето конзервативците би можеле да освојат 87 места, а лабуристите 50 во 150-члениот Претставнички дом, што е за 71 место помалку во однос на нивната сегашна застапеност. Лабуристите владеат со земјата од 2007 година.

Гласањето во Австралија е задолжително, се одржува во сабота, но целиот изборен процес веќе е почнат во оддалечените, изолирани делови.

На изборите учествуваат и околу 50 мали партии, со свои кандидати, а меѓу нив најпознат е основачот на Викиликс Џулијан Асанж.

Тој се кандидира за место во Сенатот во австралиската држава Викторија. Асанж пред неколку недели изјави дека е горд на поддршката, која ја ужива во својата татковина.

Пребегнатиот поранешен хакер за теливизијата „Тен нетворк“ од еквадорската Амбасада во Лондон, каде моментално престојува, изјави дека неговата популарност не се одразила позитивно врз владејачките лабуристи.

Австралиската Влада ги поддржува САД, кои ја осудија страницата Викиликс, поради објавување на стотици илјади доверливи американски документи.

Според истражувањето на сиднејската агенција за испитување на јавното мислење „УМР рисрч“, на која Лабуристичката партија и ги доверува и своите интерни анкети, 26 отсто од австралските избирачи ќе гласаат за Асанж или за други кандидати на партијата на Викиликс.