Папата Франциск претпладнево во Спомен куќата на Мајка Тереза имаше средба со лидерите на верските заедници во земјава и со претставници на граѓани од ранливите категории.
На средбата со папата присуствуваа поглаварот на МПЦ ОА г.г. Стефан и поглаварите на Исламската верска заедница Сулејман Ефенди Реџепи, на Евангелско-методистичката црква Михаил Цеков и на Еврејската заедница Берта Романо Николиќ.
Претходно, папата со наведната глава се помоли пред споменикот на Мајка Тереза и положи цвеќе. Тој беше придружуван од четири чесни сестри, кои и припаѓаат на редот што го основа Мајка Тереза.
Папата по пристигнувањето во Скопје утрово имаше средба со државниот врв и дипломатскиот кор во „Вила Водно“.
Поглаварот на Римокатоличката црква на плоштадот „Македонија“ ќе отслужи миса на која се очекува да присуствуваат голем број граѓани од државава и околните земји од регионот.