За време на вчерашната посета на Атина, францускиот претседател Франсоа Оланд изрази поддршка за напорите на Грција да ја заживее економијата и ги повика француските компании да инвестираат во презадолжената земја.
Тој, исто така, го истакна интересот на Франција да соработува со Грција во експлоатацијата на нафта и резервите на природен гас во Егејското Море.
– Нашата порака е порака на пријателство, поддршка, доверба и развој. Ниту еден европски народ не бил подложен на ваков тест, па затоа мора да застанеме зад Грција, изјави Оланд по средбата со грчкиот премиер Андонис Самарас.
Францускиот претседател ја истакна важноста од странски инвестиции со цел зајакнување на Грција која веќе шеста година е во криза. Тој рече дека ќе ги поттикне француските компании „активно да инвестираат“ и да учествуваат на тендерите за приватизација на државните компании за снабдување со вода и железницата, како и во други проекти.
Самарас рече дека се работи за „ново поглавје“ во билатералните односи, опишувајќи ја посетата на францускиот лидер како „глас на доверба кој докажа дека Грција повеќе не е слабата алка на Европа“.
Тој информира дека разговорите биле фокусирани на можна соработка во разни сектори вклучувајќи ја и армијата, градежништвото и главно енергијата, истакнувајќи дека Грција има за цел да стане „енергетски центар во Егејското Море“.
Францускиот претседател додаде дека „не е во Атина за да продава оружје“, коментирајќи ги шпекулациите за можниоте закуп или продажба на фрегати на Грција.
Иако обезбдувањето во Атина за време на престојот на Оланд бече големо и над градот кружеа полициски хеликоптери, тоа не беше ни одблизу како обезбедувањето при посетата на германската канцеларка Ангела Меркел во октомври минатата година.