„Вечер на соло песни“ е насловен рециталот на вокалниот солист, бас-баритонот Милан Силјанов, кој подолго време е активен на европските музички сцени. Од 20 часот тој ќе настапи во камерната сала на Филхармонијата, заедно со пијанистката Нино Чоконелидзе од Грузија.
Ќе бидат изведени циклуси на песните: „Љубовта на поетот“ оп. 48 од Шуман, „Let us garlands bring“ оп. 18 од Финзи, „Дон Кихот и Дулчинеја“ од Равел и „Отпловена Русија“ од Свиридов.
Силјанов студирал на Високата школа за уметности во Цирих и се усовршувал во познатата школа за музика и драма „Гилхол“ во Лондон, на отсекот опера, под менторство на проф. Рудолф Пјерне. Добитник е на значајни награди и признанија и соработник со светски познати диригенти.
Во сезоната 2018/2019 се бележат неговите изведби на „Зимско патување“ од Шуберт на Музичкиот фестивал во Кембриџ, „Нелсон мисата“ од Хајдн во Дрезден, како и рецитали на Фестивалот за соло песна во Оксфорд и во „Вигмор хол“ со пијанистката Нино Чоконелидзе. Силјанов членува во ансамблот на Баварската државна опера во Минхен.