Министерството за внатрешни работи соопшти дека е целосно подготвено да обезбеди достојна и безбедна атмосфера, во која секој граѓанин ќе може да си го оствари своето избирачко право.
Од МВР велат дека согласно своите надлежности, го следат целиот изборен процес, со цел денот на гласање да мине мирно, непречено и достоинствено како што му прилега на едно демократско и слободно општество. Истакнуваат дека одлучно и бескомпромисно ќе го превенираат секој обид за нарушување на избирачкиот процес независно каде или од кого.
Во изминатиот период полициските службеници минале низа плански активности за квалитетно и ефикасно набљудување и обезбедување на севкупниот изборен процес од неговиот почеток до неговиот крај.