Грчките земјоделци ќе ги отстранат блокадите до крајот на неделата. Земјоделците од северниот и од централниот дел на земјата планираат постепоено да ги повлечат тракторите од патиштата, објави електронското издание на „Етнос“.
За утре е планирано земјоделци и трактори да пристигнат во областните центри, каде ќе има протести организирани од двата најголеми синдикати во земјата ГСЕЕ и АДЕДИ.
– Целта ни е да има силно присуство на земјоделци и земјоделски машини и трактори на демонстрациите, за да покажеме дека сме блиску до граѓаните, кои водат битка, изјави земјоделецот Христос Годиас од блокадата во реонот на градот Драма.
На магистралниот пат Атина-Солун во реонот на градот Ламија вчера се судрија полицијата и земјоделците, кои се обиделе да го запрат движењето на автомобилите. Полицијата употреби солзавец.
Протестите на грчките земјоделци траат веќе четврта недела.