Заедно со граѓаните да продолжиме да работиме на идејата за поубав и просперитетен Велес, тоа е единствената цел, нагласи на денешната прес – конференција кандидатот на ВМРО – ДПМНЕ за градоначалник на Велес, Славчо Чадиев.
Потенцирајќи оти за него да се биде кандидат на оваа партија е огромна чест и одговорност, Чадиев посочи дека изградените улици и плоштади, реконстурираните и модернизирани училишта, осовременетите и опремени болници се доказ дека неуморно работат за подобрување на животот на Велешани.
– Така и ќе продолжиме. Велес мора да биде симбол на развој, на прогрес, на иднина и затоа целиот свој личен капацитет, знаење и искуство јас и мојот тим ќе ги ставиме во функција на својот град и граѓаните. Наша обврска е Велес да прерасне во еден модерен град на среќни и задоволни граѓани, рече Чадиев.
Во таа насока, подвлече, ВМРО-ДПМНЕ има изготвено програма која што ќе ја понудиме пред нашите граѓани, а ги содржи сите аспекти од општественото живеење.
– Програмата вклучува конкретни проекти кои се во насока на обезбедување поквалитетен живот на граѓаните, подобра комунална инфраструктура, поддршка за проекти од културата, образованието, младите и спортот. Главен акцент во програмата се стави на обезбедувањето услови за нови вработувања на граѓаните и реализирање на капитални инвестиции како изградба на локални патишта, улици, нови училишта, амбуланти, детски и спортски игралишта, паркови, канализациони и водоводни мрежи и многу други проекти, потенцира меѓу другото Чадиев.