Неколку здруженија и организации на противниците на британското истапување од ЕУ, денеска ќе одржат марш низ улиците на Лондон, од кој ќе побараат одржување на втор референдум за Брегзит.
Предвидено е демонстрантите да минат пред Кабинетот на британската премиерка Тереза Меј и да го завршат маршот пред зградата на Парламентот во Вестминстер.
Еден од организаторите на маршот, директорот на кампањата „Глас на народот“, Џејмс Мекгрори изјави дека движењето кое бара одржување на втор референдум за Брегзит, во моментов е „најголемо масовно движење во Велика Британија“.
Организаторите на денешниот марш се надеваат дека според бројноста ќе го надминат досега најголемиот собир на противниците на Брегзит, одржан лани во октомври, на кој присуствуваа околу 700.000 лица.
Тие ангажираа над 200 автобуси од цела Велика Британија за превоз на учесниците на маршот во Лондон.
Во меѓу време, иницијаторите на петицијата за отфрлање на Брегзит соопштија дека за само три дена собрале четири милиони потписи.