Инвестиции и богатство гледаат само Анѓушев, Заев и криминалниот картел околу нив, а граѓаните живеат се посиромашно, доказ дека економијата тоне е континуираното зголемување на бројот на граѓани кои живеат под прагот на сиромаштија, реагираа од опозициската ВМРО-ДПМНЕ на денешната прес-конференција на вицепремиерот задолжен за економски прашања, Кочо Анѓушев.
„Преку 500.000 луѓе не можат да се прехранат, а Заев и Анѓушев ги убедуваат дека од славините тече мед и млеко.
Минатата година се реализирани 624 милиони евра странски директни инвестиции или 5.9% од БДП, од кои 405 милиони евра се реинвестирана добивка на веќе постоечки претпријатија, кои се инвеститори во ТИРЗ, како резултат на добрите политики на ВМРО-ДПМНЕ во минатото.
Вистинската вредност на СДИ е само 219 милиони евра или 2.1% од БДП. Вистинското ниво на странските директни инвестиции во 2018 година е за 4 пати помало од истите во 2008 година.
Власта не ја кажува вистината и манипулира. СДСМ, која ги плукаше СДИ и добрите економски политики сега се фали со резултатите постигнати од мерките на ВМРО-ДПМНЕ. Власта е неспособна да генерира раст и развој и затоа се фали со туѓи успеси“, се вели во реакцијата на ВМРО-ДПМНЕ.