Дуалното образование, привлекувањето странски инвеститори и подобрувањето на законската регулатива во делот на економијата се областите на кои ќе се работи во следниот период заедно со германскиот експерт Валтер Дефа, испратен од канцеларката Ангела Меркел, кој утрово во Владата го имаше првиот состанок со вицепремиерот за економски прашања Кочо Анѓушев.
– Ги разгледавме сите околности во Македонија од економски аспект. Ги разгледавме областите во што ќе работиме заедно со консултантот. Тоа ќе бидат областите што ќе обезбедат подобри економски околности за работа и ќе ја подобрат бизнис климата во државата, изјави вицепремиерот Анѓушев, одговарајќи на новинарско прашање пред презентацијата на Оперативниот план за вработување за 2019 година.
Првичниот совет од германскиот експерт, како што рече Анѓушев, е дека државата има добар моментум кој треба да се искористи и да се подобри економијата и стандардот на граѓаните.
Валтер Дефа е долгогодишен претставник на СР Германија во Европската комисија каде извршувал повеќе должности. Меѓу другото, бил директор на Генералниот директорат за регионална политика, а го предводел и Генералниот директорат за даноци и царини на Европската комисија.