Работна група составена од експерти до септември треба да даде предлог, како ќе се одвива процесот на децентрализација на општините, којшто подолг период е закочен, најави министерот за локална самопурава, Сухејл Фазлиу, кој денеска присуствуваше на регионалните формуски сесии во Штип.
-Ние го следиме процесот, а во рамките на тоа имаме формирано од страна на Владата една работна група, којашто ја координира Министерството за локална самоуправа, а има за цел ревидирање на начинот на финансирање на општините преку блок-дотациите. До крајот на септември ќе излеземе со конкретна формула за начинот на финансирање, ќе ги разгледаме, каде биле предностите и слабостите на овој начин на финансирање, досегашниот, да ги поправиме и дефинитивно начинот на распределба на блок-дотациите да биде на задоволително ниво кон општините, за да не следат повторно долгови, вели Фазлиу.
Градоначалникот на Општина Штип, Благој Бочварски истакна дека добро е што има поместување во делот на процесот на децентрализација, а новините и преземањето на ингеренциите од централната власт треба да се прави внимателно и да има добар предлог како тоа ќе се направи.
-Јас сум позитивен кога треба да зборуваме за процесот на децентрализација, којашто е почнат во далечната 2005 година, кога дел од институциите се префрлени под ингеренции на општините. Јас верувам дека општината има поголем и подобар капацитет и увид што се случува на нејзината територија, за подобро да работи и ги менаџира тие институции, вели Бочварски.
Тој забележа дека градоначалниците веќе имале и состанок во Министерството за култура, каде што разговарале за преземање на центрите за култура под општинска капа.
-Ние сме отворени, но тоа мора внимателно да се направи, заради тоа што многу е важно на кој начин ќе бидат предадени, долговите да бидат расчистени, од друга страна многу е важно блок-дотациите, коишто ќе ги добиеме за менаџирање со тие институции да бидат доволни, со цел ние да можеме да работиме. Јас сум убеден и тврдам дека општините ќе можат подобро да се справат и да работат со тие институции, вели Бочварски.
Штипскиот градоначалник истакна дека тој е поборник да продолжи процесот на децентрализација на општините од неколку аспекти, меѓу кои и како една од мерките за да се намали процесот на иселување на младите кон Скопје или странство.