Комплетно реновиран дел од Универзитетската клиника за пластична и реконструктивна хирургија е пуштен денеска во употреба, соопштуваат од Министерството за здравство.
Директорката на Клиниката за пластична и реконструктивна хирургија, д-р Софија Пејкова, изјави дека станува збор за комплетна реконструкција на болничките соби, кујната, сите тоалети и бањи за пациентите, подовите, водоводната и електричната инсталација, како и осветлувањето. Воедно, истакна дека поради намалените просторно-технички услови, кои се настанати од реконструкцијата, клиниката работи со намален капацитет.
Од утре стартува и втората фаза од реконструкцијата со којашто ќе се опфатат и останатите оддели при Клиниката за пластична и реконструктивна хирургија.
Се очекува на почеток на март, годинава, да биде завршена комплетната реконструкција на клиниката.